ОХУ-д эзлэгдсэн Крымийн хойг руу өнгөрсөн шөнө Украины талаас олон тооны дроноор дайралт хийсэн тул Керчийн хоолойн гүүрийг хаахад хүрсэн талаар Москва мэдээлэв. Керчийн гүүр нь ОХУ-ын эх газрыг Крымийн хойгтой холбодог гол зам юм.
Оросын Агаарын довтолгооноос хамгаалах зэвсэгт хүчин нэг шөнийн дотор Крым, Азовын тэнгисийн дээгүүр дайралт хийсэн 41 дроныг саатуулж, устгасан гэж Батлан хамгаалах яам мэдэгдэв. Энэ нь өнгөрсөн наймдугаар сарын 25-нд Украины талаас хийсэн дроны дайралтаас нэгээр л дутуу байсныг онцолж байна. Наймдугаар сарын 25-ны дайралтыг дайн эхэлснээс хойш хамгийн олон дроноор дайрсан халдлагад тооцож байсан.
Харин нөгөө талд ОХУ-аас “Шахед” төрлийн 17 дрон, зургаан С-300 зенитийн пуужингаар нэг шөнийн дотор Украины Львов, Ивано-Франковск, Тернополь зэрэг баруун бүс нутгууд руу дайрсан гэж Украины агаарын цэргийн хүчнийхэн мэдэгдэв. Украины агаарын довтолгооноос хамгаалах хүчин эдгээр нисгэгчгүй онгоцнуудаас 10-ыг нь устгасан гэж Агаарын цэргийн хүчний мэдэгдэлд дурджээ.
ЭХ СУРВАЛЖ: BLOOMBERG
0 cэтгэгдэлтэй